Ռուսաստանի արտաքին գործերի նախարար Սերգեյ Լավրովն այսօր կմեկնի Բաքու, որտեղ նախատեսված են մի շարք հանդիպումներ՝ քննարկելու Լեռնային Ղարաբաղում տիրող իրավիճակը։ Լավրովն Ադրբեջանի մայրաքաղաքում կմնա մինչև երեքշաբթի։ Այս մասին հայտնում է ՏԱՍՍ-ը։
ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Բաքվում նախատեսվում են մի շարք հանդիպումներ՝ դիտարկելու երկկողմ և տարածաշրջանային համագործակցության, ինչպես նաև միջազգային ասպարեզում փոխգործակցության հարցերի լայն շրջանակը։
Առաջնահերթ ուշադրություն է դարձվելու Հայաստանի, Ռուսաստանի և Ադրբեջանի ղեկավարների 2020 թվականի նոյեմբերի 9-ի և 2021 թվականի հունվարի 11-ի հայտարարությունների իրագործման գործնական կողմերին։
Հիշեցնենք, որ մայիսի 5-6-ին Սերգեյ Լավրովը ժամանել էր Երևան, որտեղ հանդիպումներ ունեցավ ՀՀ ԱԳ նախարարի պաշտոնակատար Արա Այվազյանի և պաշտոնակատար Նիկոլ Փաշինյանի հետ։