Ադրբեջանի նախագահ Իլհամ Ալիևի հանձնարարությամբ երկրի ավտոմոբիլային ճանապարհների պետական գործակալությունը լայնամասշտաբ աշխատանքներ է իրականացնում Արցախի բռնազավթված տարածքներում ենթակառուցվածների կառուցման և վերականգնման ուղղությամբ:
Ինչպես փոխանցում է Minval.az-ը, իրականացվող նախագծերի թվում են Խուդաֆերին-Որոտան-Բերձոր (Խուդաֆերին-Կուբաթլու-Լաչին) և Խանլիգ-Որոտան (Խանլիգ-Կուբաթլու) ավտոճանապարհները:
Խուդաֆերին-Կուբաթլու-Լաչին ավտոճանապարհի երկարությունը, որը սկսվում է Խուդաֆերին ջրամբարի մոտ գտնվող Հաջիգաբուլ-Մինջիվան-Զանգեզուրի միջանցք անվանումը ստացած մայրուղու հատվածից, կազմում է 66 կմ:
Նախատեսվում է նաև 17 կմ երկարությամբ նոր ճանապարհ կառուցել Խանլիգ բնակավայրից մինչև Կուբաթլու (Որոտան) քաղաք:
Նշվում է, որ նոր ավտոճանապարհներն անցնելու են Զանգելանի (Կովսական), Որոտանի և Բերձորի շրջաններով: