Հռոմի պապ Ֆրանցիսկոսը Լեռնային Ղարաբաղում տեղի ունեցող իրադարձությունները ողբերգություն է անվանել:
Այդ մասին նա հայտարարել է Սուրբ Պետրոսի հրապարակում կիրակնօրյա պատարագի ժամանակ, գրում է «ՏԱՍՍ» գործակալությունը:
«Բոլոր սրբերի տոնի այս օրը (կաթոլիկների կողմից նշվում է նոյեմբերի 1-ին), եկեք չմոռանանք, թե ինչ է կատարվում Լեռնային Ղարաբաղում, որտեղ զինված բախում է տեղի ունենում և ընդհատվում կարճ զինադադարներով: Տները, ենթակառուցվածքները և աղոթատեղիները ավերվում են: Ռազմական գործողություններն ավելի ու ավելի են ազդում խաղաղ բնակչության վրա: Սա ողբերգություն է», – ասել է Հռոմի պապը։
Նա հակառակորդ կողմերին կոչ է արել հրաժարվել ռազմական մեթոդներից, որոնց պատճառով թափվում է անմեղ մարդկանց արյունը: «Չպետք է մտածել, որ վեճը կարող է լուծվել բռնության կիրառմամբ, այլ միայն միջազգային հանրության օժանդակությամբ բանակցությունների միջոցով: Ես համերաշխություն եմ հայտնում բոլոր նրանց, ովքեր տառապում են և դիմում եմ բոլոր սրբերին՝ վերադարձեք խաղաղությունը տարածաշրջանին», – եզրափակել է Ֆրանցիսկոս պապը։