Արցախյան 44-օրյա պատերազմի առնչությամբ հարուցվել է 1580 քրեական գործ

490

Արցախյան 44-օրյա պատերազմի առնչությամբ Հայաստանում հարուցվել է 1580 քրեական գործ, որոնցով որպես մեղադրյալ է ներգրավվել 628 անձ։ Հայտնում է ՀՀ Գլխավոր դատախազությունը։

Մեղադրյալների թվում կան նաև բաձրաստիճան սպաներ, որոնց ինքնությունն առայժմ չի բացահայտվում։

Ինչպես հայտնում է ՀՀ գլխավոր դատախազությունը, ահռելի ծավալներ ունեցող այդ քրեական գործերի քննությունն իրականացվում է մի քանի հիմնական ուղղություններով՝ զորահավաքային զորակոչի և զորահամալրման գործընթացներում թույլ տրված խախտումներ, պատերազմից առաջ և դրա ընթացքում սպառազինության, ռազմական պարագաների գնումների ձեռբերման ընթացքում հնարավոր կոռուպցիոն սխեմաների գործադրում, զինված ուժերի ու առանձին ստորաբաժանումների ղեկավարման, ռազմավարական ու մարտավարական գործողությունների իրականացման ընթացքում հանցավոր թերացումներ, հրամանատարության կողմից տրված հրամանների, մարտական առաջադրանքների կատարումից հրաժարվելու դեպքերի պատճառների և հետևանքների պարզում:

Բացի այդ, ԱԱԾ–ում ուսումնասիրության առարկա են դարձել նաև Շուշին ու Հադրութը հանձնելու վերաբերյալ սոցկայքերի ու մամուլի հրապարակումները։

Ինչպես դատախազության հրապարակած տեսանյութում հայտնում է ՀՀ ԳԴ ԱԱԾ մինչդատական վարույթի նկատմամբ հսկողության վարչության պետի տեղակալ Էդգար Արսենյանը, հրապարակումները հիմնականում վերաբերել են Շուշիի և Հադրութի շրջակայքում ընթացած մարտերին։

«Հարցաքննվել են 3 տասնյակից ավելի անձինք, որոնց թվում են ինչպես ներկա, այնպես էլ նախկին բարձրաստիճան պաշտոնատար անձինք»,– ասում է Արսենյանը։

Նա նաև հայտնում է, որ ԱԱԾ–ում հարուցվել է քրեական գործ` պետական դավաճանության հատկանիշներով, որով 1 անձի մեղադրանք է առաջադրվել որպես կատարող, 1-ի նկատմամբ` որպես հանցակից։ Առաջինը կալանավորված է, երկրորդը ստորագրությամբ ազատ է արձակվել։

Քննության ընթացքում են նաև անհետ կորած ու գերի ընկած զինծառայողների ծնողներից գումար շորթելու փաստով 5 քրեական գործեր, որոնցով 3 անձ կալանավորվել է։