Արդեն հայտնի է, թե քանի երկրի համար է Վրաստանը բաց: Երկրի կառավարությունը շարունակում է հրապարակել ցանկը: Այս մասին գրել է Aliq.ge-ն։
Արդեն նշել էինք, որ թույլատրվել է Գերմանիայից, Ֆրանսիայից, Լատվիայից, Լիտվայից, Էստոնիայից` Վրաստանի քաղաքացիություն կամ կեցության իրավունք ունեցող անձանց մուտքը երկիր: Ի դեպ, նրանք կարող են Վրաստան հասնել ուղիղ ավիաչվերթներով:
Վրաստանի կառավարությունը թույլատրել է նաև եվրոպական 13 երկրների քաղաքացիների ու ռեզիդենտների մուտքը, սակայն նրանց համար 14-օրյա կարանտինը պարտադիր կլինի: Ցանկում են` Իսպանիան, Լյուքսեմբուրգը, Նիդերլանդները, Լեհաստանը, Պորտուգալիան, Ռումինիան, Հունաստանը, Շվեդիան, Խորվաթիան, Իտալիան, Կիպրոսը, Սլովենիան, Իսլանդիան:
Վրաստան ժամանելուց առաջ եվրոպացիները պետք է հատուկ ձևաթուղթ լրացնեն, որտեղ նշելու են վերջին 2 շաբաթվա ուղևորությունների մասին և կոնտակտային տվյալներ:
Արդեն բանակցություններ են տարվում եվրոպական ավիափոխադրողների հետ` ավիահաղորդակցությունը վերականգնելու ուղղությամբ: Կառավարության արձանագրության մեջ ասվում է, որ նշված երկրների ցանկը պարբերաբար համալրվելու է:
Պարտադիր կարանտինն ուժի մեջ է մնում նաև հայրենիք վերադարձող` Վրաստանի քաղաքացիների համար:
Հստակեցված է նաև գործնական այցելությունների կարգը: Գործարարը ցանկացած երկրից կարող է Վրաստան գալ` վճարելով 2 շաբաթվա կարանտինի կամ երկու շաբաթվա ընթացքում 72 ժամը մեկ PCR թեստի անելու արժեքը:
