Երկրի տերե՞ր, թե՞ պերսոնա նոն գրատա
Հայաստան ժամանած ադրբեջանցի պատգամավորներն իրենց զգում են ինչպես իրենց հայրենիքում։ Այս մասին ֆեյսբուքյան իր էջում գրել է իրավապաշտպան Ավետիք Իշխանյանը։
«Նրանք գրառումներ են անում, թե Երևանն իրենցն է լինելու, պարսկական մզկիթն անվանում ադրբեջանական և որ իսկական տերերը շուտով կվերադառնան։Ցանկացած երկրում, նման արտահայտություններ որևէ օտարերկրյա հյուր իրեն թույլ չէր տա, առավել ևս թշնամական պետության ներկայացուցիչ։
Այնուամենայնիվ, եթե այդպիսի բան տեղի ունենար, ապա տվյալ երկրի իշխանությունն այդ անձանց նվազագույնը կհայտարարեր որպես պերսոնա նոն գրատա և կարտաքսեր երկրից, իսկ Ադրբեջանում կկալանավորեին։ Ավելին, նրանք Ադրբեջանում այդպես պաշտպանված չեն, ինչպես «իրենց հայրենիքում»։
Նրանց դեմ բողոքի ցույցի դուրս եկած երիտասարդներին «հերոսաբար» բռնության է ենթարկում ադրբեջանցիների դաշնակից վարչապետի թիկնազորը։ Մի խոսքով, Հայաստանի և հայ ժողովրդի նվաստացումները շարունակվում են և արդեն կասկածից դուրս է, որ այս ամենը ապիկարության և հիմարության հետևանք չի, այլ․․․»,- գրել է Իշխանյանը։
Նշենք, որ ադրբեջանցի պատգամավորը մասնավորապես գրել էր․
«Եղանք Կապույտ մզկիթում: Ինչպես գիտենք, Իրևանում մնացած միակ ադրբեջանական հուշարձանն է: Որքան էլ որ պատերի վրա գրածները վերաբերվում են ուրիշ պետության, միևնույն է, պատերը, ճարտարապետությունը, ոգին մերն է: Հավատում ենք, որ իրական տերերը շատ շուտով կկարողանան աղոթել մզկիթում, Ադրբեջանի աղոթքները միշտ բարի նպատակներով են, և դրանք տեղ են հասնում»:
