Արցախի պետնախարար Ռուբեն Վարդանյանն իր տելեգրամյան էջում գրում է.
«Էլեկտրաէներգիայի հետ կապված իրավիճակը շրջափակված Արցախում գնալով վատանում է:
Ադրբեջանի վերահսկողության տակ գտնվող տարածքում հոսանքազրկված էլեկտրահաղորդման գիծը դեռ չի վերականգնվել, արգելափակված է մուտքը դեպի «վթարի» վայր։
Արցախի օպերատիվ շտաբի այսօրվա նիստում, որը վարել է պետնախարար Ռուբեն Վարդանյանը, քննարկվել են հանրապետությունում զարգացած էներգետիկ ճգնաժամի համատեքստում բնակչության նվազագույն էներգետիկ կարիքների շարունակական բավարարմանը և կենսական նշանակության օբյեկտների անխափան աշխատանքին վերաբերող հարցեր։
Ռուբեն Վարդանյանը նշել է իրավիճակի բարդությունը և անհրաժեշտ է քայլեր ձեռնարկել, որպեսզի բնակչության նվազագույն անհրաժեշտ էներգետիկ կարիքները հնարավորինս երկար բավարարվեն։
Պետնախարարը ոլորտի ղեկավարներին հանձնարարել է առաջարկներ ներկայացնել էներգախնայողության ռեժիմին անցնելու և էլեկտրաէներգիայի սպառման առավելագույն կրճատման համար»։
