Երեկ հայտնի դարձավ, որ փետրվարի 21-25-ը Աբու Դաբիում ընթանող IDEX-2021 միջազգային ռազմարդյունաբերական ցուցահանդեսին Հայաստանը մասնակցում է դատարկ տաղավարներով՝ միայն բուկլետ բաժանելով։
Օգտատերերից մեկը գրել է, որ պատճառը «Իմ քայլում» ռազմարդյունաբերության ոլորտի վրա աչք դրած կամ ՊՆ նախարարի ամբիցիաներ ունեցող մեկն է, ով կարողացել է ձախողել մեր ցուցանմուշների՝ ժամանակին տեղ հասնելը, որ Նիկոլի աչքում քցի կազմակերպիչներին ու ոլորտը իրենով անի»։
Սրան հաջորդեց Բարձր տեխնոլոգիական արդյունաբերության նախարարության հաղորդագրությունը, որով նշում էին՝ իբր, թե ցուցանմուշների տեղափոխությունը կազմակերպվել է նախապես, այն հաշվարկով, որպեսզի սահմանված ժամկետում՝ մինչև ցուցահանդեսի բացումը, առաքանին տեղում լինի:
«Առաջացած լոգիստիկ խնդիրների հետևանքով հայկական ռազմական տեխնիկայի ցուցանմուշները չեն հասել Աբու Դաբի։ Տեղի ունեցածի հանգամանքները պարզելու նպատակով նախարարի հրամանով սկսվում է ծառայողական քննություն»,-հայտնել են նախարարությունից:
Հարկ ենք համարում նշել, որ hetq.am-ը պարզել է, որ IDEX-2021 միջազգային ցուցահանդեսի ժամանակ Հայաստանի տաղավարի կառուցապատման և դիզայներական աշխատանքների կատարման նպատակով դեռևս փետրվարի 2-ին Բարձր տեխնոլոգիական արդյունաբերության նախարարությունը ծառայությունների մատուցման պայմանագիր էր կնքել «Էքսպո Գրուպ» ՍՊԸ-ի հետ: Պայմանագրի գինը կազմել է 23 մլն դրամ:
Այսինքն, պետական բյուջեից 23 մլն դրամ է ծախսվել դատարկ տաղավարի և բուկլետների համար։
Ի տարբերություն հայկական դատարկ տաղավարի, Ադրբեջանը ցուցադրել է իր զենքի տեսակները: