«Նեզավիսիմայա գազետա» պարբերականը վերլուծական հոդվածով անդրադարձել է հայ-ռուսական ռազմական ու ռազմատեխնիկական համագործակցության խորացմանը և վերլուծական հոդվածով ամփոփել է Սերժ Սարգսյանի՝ Ռուսաստան կատարած այցելության արդյունքները: Հրապարակման համաձայն՝ ՀՀ նախագահի և պաշտպանության նախարարի այցելության արդյունքում զորքերի միավորված ստորաբաժանումների ստեղծման շուրջ որոշակի տեղաշարժ կա:
Պարբերականի հետ զրույցում ՌԴ գեներալ-լեյտենանտ Յուրի Նետկաչևը, անդրադառնալով հայ-ռուսական և ռուս-ադրբեջանական հարաբերություններին, նշել է, որ միավորված ստորաբաժանումները հայ-ադրբեջանական բախումների ժամանակ գործի չի դրվի՝ շեշտելով. «Նման պայմաններում դժվար է պատկերացնել, որ ՌԴ-ն կփոխի ուղենիշը և Ադրբեջանի ու Հայաստանի առճակատման ժամանակ կկանգնի որևէ մեկի կողքին։ ՀՀ-ում զորքերի միացյալ խմբավորում ստեղծելը կապ ունի հարևան Թուրքիայի հետ, որը ՆԱՏՕ-ի դաշինքի մեջ է։ Բացի այդ, և Մոսկվայի, և Երևանի համար, կարծես թե, անհանգստության տեղիք են տվել Վրաստանում տեղի ունեցող իրադարձությունները։ Այս երկրի մի շարք շրջանները բնակեցված են հայերով։ Թբիլիսին ձգտում է դեպի ՆԱՏՕ և սպառնում ՌԴ-ի բարեկամական երկրներին։ Սա կարևոր գործոն է Մոսկվայի դիրքը տարածաշրջանում ամրապնդելու համար»։
