«ՍԴ անդամ Հրայր Թովմասյանի լիազորությունները դադարեցնելու հարցով Սահմանադրական դատարան դիմելու մասին» որոշման նախագիծն ընդգրկվել է ԱԺ քառօրյա:
Քառօրյայի օրակարգում ընդգրկված վերջին հարցը «ՍԴ անդամ Հրայր Թովմասյանի լիազորությունները դադարեցնելու հարցով Սահմանադրական դատարան դիմելու մասին» որոշման նախագիծն է: Պետաիրավական հարցերի հանձնաժողովի փոխնախագահ Աննա Կարապետյան հայտնեց, որ այդ հարցը հավանաբար կքննարկվի քառօրյա նիստերի վերջին օրը, եթե օրակարգում փոփոխություններ չլինեն:
Նշենք, որ մինչ քառօրյայի նիստերի օրակարգում ընդգրկվելը, այսօր որոշման նախագիծը քննարկվել է Ազգային ժողովի խորհրդի նիստում: Ավելի վաղ Պետաիրավական հարցերի հանձնաժողովը «Իմ քայլը» խմբակցության ներկայացրած որոշման նախագծին դրական եզրակացություն էր տվել:
Սահմանադրական դատարանի աշխատակազմի ղեկավար Էդգար Ղազարյանը նշել է, որ որոշմանը ծանոթ չէ եւ ի պաշտոնե իրավասու չէ մեկնաբանել ԱԺ խմբակցությունների որոշումները կամ հայտարարությունները:
Փաստաթղթում նշվում է 4 հիմք, որոնց հիման վրա «Իմ քայլը» խմբակցությունը պատրաստվում է դիմել ՍԴ՝ Թովմասյանի լիազորությունները դադարեցնելու համար:
