Ֆրանսիական «Ֆորում Օպերա» ամսագիրն այսօր տեղեկություն հրապարակեց, որ ազգությամբ ադրբեջանցի տենոր Յուսիֆ Էյվազովը քաղաքական դրդապատճառներով հրաժարվել է ելույթ ունենալ հայազգի սոպրանո Ռուզան Մանթաշյանի հետ։
Երկու արտիստները փետրվարի 7-ին պետք է երգեին Դրեզդենի օպերային թատրոնում կայանալիք պարահանդեսի շրջանակներում։ Այս մասին հայտնում է օպերային երգչուհի Հասմիկ Պապյանը:
«Ու՞ր ենք հասել… Ազգությամբ ադրբեջանցի, կարգավիճակով՝ սոպրանո Աննա Նետրեբկոյի ամուսին, երգիչ Յուսիֆ Էյվազովը հրաժարվել է փետրվարի 7-ին հանդես գալ Դրեզդենի ամենամյա Օպերային Բալի բացման արարողությանը հայ երգչուհի Ռուզան Մանթաշյանի հետ, պատճառաբանելով վերջինիս հայ լինելը, այսինքն քաղաքական նկատառումներով: Բազմիցս եմ երգել հիշյալ օպերային թատրոնում, չեմ կարողանում մտաբերել նմանատիպ երևույթ: Պատրաստվում եմ բողոքի ձայն բարձրացնել…»:
Պարահանդեսը փակ միջոցառում էր՝ նախատեսված գերմանական բարձրաշխարհիկ հասարակության համար։
