Քեսաբում օր օրի անհանգստությունը մեծանում է՝ «Իսլամական պետություն» ահաբեկչական խմբավորման սպառնալիքների պատճառով:
«Ակօս»-ի հետ զրույցում քեսաբցիներից մեկն ասել է, որ ստեղծված պատերազմական վիճակում իրենք հակառակորդ կողմերի միջև գերի են դարձել և փոքրիկ բռնկումն անգամ իրենց համար կյանք է արժենում:
Այժմ էլ թուրք-սիրիական սահմանի մոտ գտնվող Քեսաբում ռումբերի պայթյունների ձայներ են լսվում: Այս օրերին քեսաբցիներն ԻՊ-ի վտանգի տակ գոյության պայքար են մղում:
«Մեզանից անկախ դեպքեր են զարգանում, մեր ճակատագիրը քաղաքական խաղերով է որոշվում: Մենք մեր աչքով տեսանք, որ Թուրքիան օգնում էր զինյալներին: Ոչ ոք չի կարող երաշխավորել, որ նման բան այլևս տեղի չի ունենալու»,- ասել է Քեսաբի մի բնակիչ:
Բնակչի պատմելով՝ այժմ Քեսաբի դիմաց՝ թուրքական կողմում, զինվորականների քանակն օր օրի ավելանում է, և դա տեսանելի է անզեն աչքով՝ երբեմն անգամ Լաթաքիայից:
