ՌԴ նախագահի օգնական Յուրի Ուշակովը հայտնել է, որ ՌԴ նախագահ Վլադիմիր Պուտինի այցը Հայաստան քննարկվել է, սակայն մինչև այս տարվա ավարտ քիչ հավանական է և պետք է աշխատել 2019 թվականի համար: Տեղեկացնում է «ՌԻԱ Նովոստի»–ն։
«Իսկապես, քննարկվել է մեր նախագահի այցի կազմակերպման հնարավորությունը Հայաստան, սակայն հստակ ժամկետներ չի քննարկվել»,–ասել է Ուշակովը ճեպազրույցի ժամանակ։
«Նկատի է առնվել, որ նախագահները կհանդիպեն ոչ միայն Դուշանբեում (ԱՊՀ գագաթնաժողովին), այլ նաև Աստանայում՝ ՀԱՊԿ նստաշրջանին… Կարծում եմ՝ հնարավոր է, այցի մասով տեղին կլինի սպասել հաջորդ տարում»,–հավելել է նա։
Նշենք, որ ՀՀ ԱԳՆ մամուլի քարտուղար Տիգրան Բալայանը հայտարարել էր, որ ՌԴ նախագահ Վլադիմիր Պուտինը Հայաստան կժամանի պաշտոնական այցով։ Հաստատելով սպասվող այցը՝ ԱԳՆ մամուլի քարտուղարն, այնուամենայնիվ, որևէ հստակություն չմտցրեց։ Այցը նախատեսվում է մոտ ժամանակներս, իսկ թե երբ, Բալայանը չնշեց։
