ՀՀ վարչապետ Նիկոլ Փաշինյանը Դավթաշենում «Իմ քայլը» դաշինքի հանրահավաքի ժամանակ հայտարարել է, որ ԱԱԾ եւ ՀՔԾ պետերի հեռախոսազրույցի գաղտնալսումը դավադրություն է պետականության դեմ: Փաշինյանը իրավապահներին հանձնարարել է հայտնաբերել եւ ենթարկել ամենախիստ պատասխանատվության: Ըստ վարչապետի, Հայաստանում որոշ խմբավորումներ տարիներ առաջ ձեռք են բերել գաղտնալսող սարքեր, ստեղծելով «գաղտնի ծառայություններ»:
Նիկոլ Փաշինյանը երկու ժամ է տվել ԱԱԾ պետին ու ոստիկանությանը ռեյդեր անցկացնել, ասֆալտին պառկեցնել եւ զինաթափել օլիգարխների, բարձրաստիճան պաշտոնյաների ապօրինի զինված խմբավորումները: «Երկու ժամից լսեմ ձեր զեկույցը արձանագրված արդյունքների մասին»,- ասել է նա:
«Ոչ մի մուկ, ոչ մի ձուկ չի պլստալու, Հայաստանում գողերի ժամանակն անցել է, գտնոլու բերելու ենք իրենց ու վերադարձնենք ամեն մի լուման: Ռոբերտ Քոչարյան ու Սերժ Սարգսյան, դուք որոշել եք մարտահրավեր նետել Հայաստանի ժողովրդին, դե հիմա կտեսնեք»,- հայտարարել է Փաշինյանը:
Վարչապետը հավելել է, որ եթե ոստիկանությունն ու ԱԱծ-ն չկարողանան լուծել այս խնդիրը, ինքը կհագնի կամուֆլյաժն ու ժողովրդի հետ միասին փողոց առ փողոց կարգուկանոն կհաստատի՝ հավելելով, որ «Հայաստանում սպիտակները հաղթել են, սեւերը ջախջախված են»:
