Վերջին օրերին արդեն 10 պետություն խզել է դիվանագիտական հարաբերությունները Կատարի հետ:
Եգիպտոսը, Սաուդյան Արաբիան, Բահրեյնը, ԱՄԷ-ն, Եմենը, Լիբիան, Մալդիվյան և Մավրիկիայի հանրապետությունները, ինչպես նաև Կոմորյան կղզիները խզել են Կատարի հետ դիվանագիտական հարաբերությունները՝ վերջինիս մեղադրելով «տարածաշրջանն ապակայունացնելու և ահաբեկչական գործունեությունն աջակցելու» մեջ։
Իր հերթին Սաուդյան Արաբիայի գլխավորած արաբական կոալիցիայի հրամանատարությունը հայտարարել է, որ դադարեցվում է Կատարի մասնակցությունը Եմենում ռազմական գործողությանը՝ «Դոհայի կողմից «Ալ կաիդայի» եւ ԻՊ-ի անօրինական խմբավորումներին աջակցելու պատճառով»:
Նշենք, որ Կատարի և հարևանների միջև կոնֆլիկտը ծագել է Էր Ռիադում Պարսից ծոցի երկրների և ԱՄՆ-ի գագաթնաժողովից մեկ շաբաթ անց, երբ Կատարի լրատվական գործակալությունը երկրի էմիրի անունից ուղերձ է տեղադրել՝ Իրանի հետ հարաբերություններ կառուցելու օգտին: Հանդիպման ժամանակ Սաուդյան Արաբիայի իշխանությունները բոլոր հյուրերի անունից՝ դատապարտել էին Թեհրանին՝ նրա թշնամական քաղաքականության համար և սպառնացել համարժեք պատասխանով:
Ավելի ուշ Կատարի ԱԳՆ պաշտոնական ներկայացուցիչը հայտարարել է, որ գործակալության կայքը կոտրել են, և էմիրի անունից հայտարարությունը հրապարակել են հաքերները: Սակայն Սաուդյան Արաբիան, ԱՄԷ-ն ու Բահրեյնն այս հերքումը համոզիչ չեն համարում:
