Հայաստանի վերաքննիչ դատարանը մերժեց նախագահի նախկին թեկնածու, էպոսագետ ներկայացող Վարդան Սեդրակյանի դիմումն ընդդեմ ընդհանուր իրավասության դատարանի որոշման, որով թեկնածուն երկամսյա կալանքի էր ենթարկվել:
Նախկին նախագահի թեկնածուն ու նրա պաշտպան Ալեքսանդր Սիրունյանը այդ որոշումը համարում են անօրինական:
Հիշեցնենք, որ Սեդրակյանը մեղադրվում է նախագահական ընտրություններում ԱԻՄ առաջնորդ Պարույր Հայրիկյանի դեմ կատարված մահափորձը պատվիրելու մեջ և մարտի 5-ից կալանքի տակ է պահվում «Երևան-Կենտրոն» քրեակատարողական հիմնարկում՝ Ազգային անվտանգության ծառայության մեկուսարանում:
Դռնփակ դատական նիստին Սեդրակյանը չէր մասնակցնում:
Սիրունյանը պնդում է, որ մեղադրող կողմը ներկայացրել է Ընտրական օրենսգրքի 87-րդ հոդվածը, որն այս պարագայում վերաբերում է Սահմանադրական դատարանում ընտրությունների արդյունքները վիճարկած նախագահի արդեն նախկին երկու թեկնածուներին՝ Րաֆֆի Հովհաննիսյանին ու Անդրիաս Ղուկասյանին, և որ Սեդրակյանին իրավունք ունեին կալանավորել:
Ընտրական օրենսգրքի 87- հոդվածի առաջին մասի համաձայն՝ Հայաստանի նախագահի թեկնածուն իր կարգավիճակը պահպանում է մինչև նախագահ ընտրվելու մասին Կենտրոնական ընտրական հանձնաժողովի որոշման վիճարկման համար սահմանված ժամկետի ավարտը, իսկ այդ որոշման վիճարկման դեպքում` մինչև Սահմանադրական դատարանի որոշում ընդունելը:
Բայց Սեդրակյանի փաստաբանն ու նրա պաշտպանյալը պնդում են, որ կալանավորման պահին Սեդրակյանը դեռևս համարվում էր նախագահի թեկնածու, իսկ Սահմանադրական դատարանի որոշումը հրապարակվել է միայն մարտի 14-ին:
Այնուամենայնիվ Վերաքննիչը մերժեց նախկին թեկնածուի դիմումը և վերջինս կշարունակի մնալ ԱԱԾ մեկուսարանում:
Սիրունյանը հայտարարարեց, որ Սեդրակյանի համաձայնությամբ կբողոքարկեն Վերաքննիչի որոշումը:
