ԱՊՀ երկրների Կովկասի ինստիտուտի բաժնի ղեկավար, ռազմական փորձագետ Վլադիմիր Եվսեևի կարծիքով՝ ԼՂ հակամարտության գոտում լայնածավալ ռազմական գործողությունների վերսկսման հավանականությունը մեծացել է:
Եվսեևի խոսքով՝ պատճառը՝ աշխարհում տեղի ունեցող փոփոխություններն են՝ Հայաստանում և նրա շուրջ իրավիճակը ևս փոփոխվում է: Հարավային Կովկասում շուրջ տասը տարի փոփոխություններ են սպասվում, որոնց արդյունքում՝ ներկայիս միաբևեռ աշխարհին փոխարինելու է գալու բազմաբևեռ աշխարհը: Խոսելով տարածաշրջանում Հայաստանի դերի մասին ռուս փորձագետը շեշտեց, որ ՀՀ-ն որպես կամուրջ կարող է ծառայել ԵՏՄ-ի և ԵՄ-ի միջև, Հայաստանն այդ իմաստով ամենահարմար երկիրն է: Ինչ վերաբեվում է Արցախյան հակարտությանը, ապա պատերազմի հավանականությունը մեծանում է, քանի որ շատ ավելի հաճախակիացել են սահմանային միջադեպերը, սադրանքները, ռազմական գործողությունների բնույթն է փոխվել, շատ ավելի խորը դիվերսիոն-հետախուզական բնույթ է սկսել ստանալ, նոր` նախկինից ավելի ծանր սպառազինություն է օգտագործվում, ու ոչ բոլորն են ռուսական:
Եվսեևը նշում է, որ Ադրբեջանը ցանկանում է տապալել ԵԱՀԿ Մինսկի խմբի ձևաչափը: Ինչպես հիշում ենք Ադրբեջանի նախագահ Իլհամ Ալիևի Բեռլին այցելության ժամանակ պարզվեց, որ Գերմանիան ցանկանում է մասնակցել ԼՂ հակամարտության կարգավորման գործընթացին, ինչը ներկայիս ձևաչափի պայմաններում անհնար է: «Գաղափար կա՝ ընդլայնել կարգավորման ձևաչափը, այլ ձևաչափեր ստեղծել, այսինքն` կա ակտիվություն, որն իրականում չի նպաստում հակամարտության կարգավորմանը»,- հավելեց նա: Փորձագետը նշում է, որ Ադրբեջանը, միգուցե, զգալով, որ իր ռեսուրսները կարող են չբավարարել, դրա համար է սադրում, միգուցե, պատճառը ԼՂ հակամարտության հանդեպ ուշադրության պակասն է, այդ քայլով Ադրբեջանը ուզում է հիշեցնել խնդրի մասին: Բայց այնուամենայնիվ, փորձագետը վստահ է, որ ո՛չ Թուրքիան, ո՛չ Ռուսաստանը, ո՛չ Իրանը չեն ցանկանում պատերազմ Հարավային Կովկասում, ուստի պետք է ձևավորեն մի ձևաչափ, որի շրջանակում պետք է պայմանավորվեն` ինչպես գործել հնարավոր պատերազմի դեպքում, ինչպես տեղայնացնել պատերազմը և թույլ չտալ, որպեսզի այն ավելի ընդլայնվի: Չնայած որ նախորդ տարվա օգոստոսից իրավիճակը լարված է և ըստ փորձագետի՝ վատագույն սցենարների ևս պետք է պատրաստ լինենք: Ավելին, Ըստ նրա` Ադրբեջանում Եվրոպական խաղերի ավարտից հետո Ադրբեջանի ձեռքերն այլևս ազատ կլինեն, և կլինեն սադրանքների հերթական ալիքներ, որոնք կարող են հանգեցնել լայնածավալ ռազմական գործողությունների:
